Skuadra modeste e Islandës shkruan historinë e futbollit modern me një fitore 2-1 që do të mbetet një plagë e hapur për futbollin anglez për shumë vjet.
Wayne Rooney e kaloi skuadren e Roy Hodgson në epërsi me konvertimin e një 11-metërshi vetëm 4 minuta nga fillimi i lojës, por dy gola në 12 minuta e ktheu ndeshjen në favor të Islandës, rezultat te cilën Islanda arriti ta ruaj pa ndonjë dramë, deri në vershellimën e funddit të ndeshjes.
Skuadra angleze largohet nga Euro 2016 me kokën ulur dhe mes turpit pas një ndeshjeje ku nuk tregoi pothuajse asgjë.
Duke filluar nga Joe Heart në portë e deri tek Kane në sulm, e gjithë 11-shja angleze zhgënjeu paturpësisht në një lojë me shumë gabime në të gjithë hapsirën e fushës, përfshire ketu edhe trajnerin Roy Hogson i cili vetëm 4 minuta nga perfundimi i ndeshjes u kujtua të aktivizojë në lojë, “xhevairin” e futbollit anglez, Marcus Rashford.
Nje humbje e turpshme në rrethana të tilla ka shkundur futbollin anglez deri në themel, me menaxherin Hodgson i cili nuk kishte rrugë tjetër përvec se të jepte dorëheqjen nga drejtimi i “Tre Luanëve”, doreheqje e konfirmuar vetëm pak momente pas përfundimit të ndeshjes.
Ndërkohë, Islanda e vetëm 300,000 banorëve, një pjesë e konsiderueshme e të cilëve ndodhen në Francë për të mbështetur përfaqësuesen e tyre, do të ndeshet me Francën në cerek-finale.